Mchungaji Mtikila Atangaza Kuwafikisha Mahakamani Wasaka Urais 6 wa CCM......Yumo Lowassa, Sumaye,Membe,January Wassira na Ngeleja

CHAMA cha Democratic Party (DP) kimetangaza kwenda mahakamani kukishtaki Chama Cha Mapinduzi (CCM) pamoja na makada wake sita kutokana na kukiuka sheria ya nchi, taratibu pamoja na kanuni za uchaguzi.

Hayo yalisemwa jana jijini Dar es Salaam na Mwenyekiti wa chama hicho Mchungaji Christopher Mtikila, wakati akizungumza na waandishi wa habari. Alisema makada hao pamoja na chama chao wamekiuka sheria za nchi pamoja na kanuni za uchaguzi.

Aliwataja makada ambao atawaburuta mahakamani kuwa ni Mawaziri wakuu wastaafu, Edward Lowassa pamoja na Frederick Sumaye.
 
Wengine ni January Makamba, William Ngeleja, Stephen Wassira pamoja na Benard Membe. Alidai makada hao walivunja sheria za nchi pamoja na kanuni za uchaguzi kutokana na kuanza kampeni zao mapema.

Alisema  watakishtaki Chama Cha Mapinduzi kutokana na kushindwa kuwachukulia hatua na kuendelea kuwaweka katika mchakato wa kutafuta mgombea wa urais wa chama hicho wakati walishavunja sheria pamoja kanuni za uchaguzi, kwahiyo walitakiwa kukatwa mapema kabisa.

"Watu wameanza kampeni mapema na kwa kufuata sheria ya nchi taratibu  pamoja na kanuni za uchaguzi ni kwamba watu hao wamevunja Sheria kwa hiyo tunapeleka kesi mahakamani kuwashtaki wao pamoja na chama chao kwa kuvunja sheria," alisema Mtikila na kuongeza;

"Tunaenda mahakamani kuishtaki CCM iliyochezea uhuru wetu kwa miaka 54 pamoja na hawa watu wao kwani hawafai na hii nchi inapoelekea ni kubaya."

Alisema uchaguzi wa mwaka huu hautakuwa halali kama sheria hazitafuatwa na kudai kuwa vitu vinavyounyima uchaguzi wa mwaka huu uhalali ni pamoja na watu kuvunja sheria kwa kuanza kampeni mapema.

Alisema inashangaza kuona pesa zinatumika bure bila sababu ya msingi na kudai kuwa ni uhalifu mkubwa tena wa kimataifa. 
 
Alisema watu wanaotumia pesa wakiachwa kitatokea kitu kibaya nchini, hii ni mbaya sana kwani pesa zinazotumika kwa sasa lazima ijulikane zinatoka wapi.

Alisema fedha hizo zinazotumika ipo  siku zitakuja kurudi mahali pake kwa hao watu wanaozitoa.

Aliendelea kusema kuwa inashangaza kuona watu wanatumia pesa  kutafuta urais. Mtikila alimshukia moja kwa moja Lowassa akisema hastahili kupewa nafasi hiyo.

"Lowasa hastahili nafasi hiyo na wanasheria wetu wapo katika maandalizi ya kuandaa kesi kwa ajili ya kuwapeleka mahakamani," alisema Mtikila.

Alisema endapo wataona katika chama chochote kuna vitendo kama ambavyo havifai hawatasita kufuata utaratibu wa kwenda mahakamani endapo watakuwa na ushahidi wa kutosha. 
 
Alisema DP ipo kwenye maandalizi na wakati ukifika watu wote watafikishwa mahakamani.

Wabunge 35 wa UKAWA Wafukuzwa Bungeni

Wabunge  35 wa kambi ya upinzani bungeni jana walitolewa nje ya ukumbi wa bunge na spika wa bunge  Anne Makinda na kupewa adhabu ya  kutokuhudhuria vikao vitano kwa madai ya kukiuka kanuni za bunge .

 

Mara baada ya kikao cha bunge kuanza spika wa bunge alinza kwa kuwakumbusha wabunge namna ya kufuata kanuni hasa pale wanapotaka kuondoa muswada wowote.

 

Hali ilibadilika ghafla Bungeni baada ya Mbunge Ezekiel Wenje kuomba Spika atoe ufafanuzi wa kwanini Mbunge Silinde hayuko kwenye list ya waliotajwa kusimamishwa lakini Askari wa Bunge wamemzuia asiingie kwenye Kikao?

Majibu ya Spika hayakuwaridhisha baadhi ya Wabunge, zikaanza tena kelele… ndipo spika aliamua  kuwatoa nje.

 

Hata hivyo baada ya vurugu zote kuisha miswada yote mitatu ambayo ni  ya sheria ya petroli, sheria ya usimamizi wa mapato ya mafuta na gesi pamoja na sheria ya uwazi na uwajibikaji katika tasnia ya uchimbaji Tanzania iliwasilishwa Bungeni.

 

Majina ya Wabunge waliotimuliwa  ni,

1. Ezekiel Wenje
2. Mussa Kombo
3. Masoud Abdallah Salim
4. Rebecca Ngodo
5. Sabrina Sungura
6. Khatib Said Haji
7. Dr. Anthony Mbassa
8. Maulidah Anna Valerian Komu
9. Kulikoyela Kahigi
10. Cecilia Pareso 
11. Joyce Mukya
12. Mariam Msabaha 
13. Grace Kiwelu
14. Israel Natse 
15.  Mustapha Akonaay
16. Konchesta Rwamlaza
17. Suleiman Bungura 
18. Rashid Ali Abdallah 
19. Ali Hamad
20. Riziki Juma
21. Rukia Kassim Ahmed
22. Azza Hamad
23. Khatibu Said Haji
24. Kombo Khamis Kombo
25. Ali Khamis Seif
26. Haroub Mohammed Shamisi 
27. Kuruthum Jumanne
28. Mchuchuli
29. Amina Mwidau
30. Mkiwa Kimwanga
31. Salum Baruhani 
32. Marry Stellah Malaki
33. Rashid Ally Omary
34. Mwanamrisho Abama
35. Lucy Owenya

ACT yailalamikia CHADEMA kuhujumu mikutano yake

CHAMA cha Alliance for Change and Transparency(ACT), kimebaini kuwepo kwa mipango inayoratibiwa na Chama Cha Demokrasia na Maendeleo (Chadema) ya kuhusika kuhujumu mikutano yake mbalimbali.

 

Hujuma hizo zimebainishwa jana jijini Dar es Salaam na Katibu wa Mipango na Mikakati Taifa  wa ACT Habibu Mchange, aliyesema kuwa chama hicho kimekuwa kikihangaikia ACT na kusahau kushughulikia matatizo ya watanzania.

 

“Chadema wamekuwa wakitufuatilia kila mahali tunapofanya mkutano na hilo wamekuwa wakifanya kwa sababu ya kutuhofia. Kwa mfano tulipokuwa na mkutano Mwanza na wao wakatangaza kufanya tukawashinda, kesho tumetangaza kufanya mkutano na wao wametangaza kufanya Kawe.

 

“Chadema tunawaonea huruma kwa kuwa tutawafanya kitu ambacho hawatasahau katika historia ya siasa za tanzania kwa sababu njia nyingi wanazotumia ni zile tulizoziratibu wakati tukiwa huko,”alisema Mchange.

 

Katika hatua nyingine Mchage alisema baada mbalimbali mikoani hivi sasa ACT kupitia viongozi wake  wa kitaifa wameandaa kufanya mkutano mkubwa kesho jijini Dar es Salaam katika viwanja vya Mwembe Yanga.

 

“Mkutano huo utatoa fursa ya kuzindua Ilani ya jiji la Dar es salaam, itakayotokana na ilani Kuu  ya chama ili kukabiliana na kero mbalimbali za jiji.

 

“mkutano huo utatoa fursa ya ACT kuwataka watanzania kuishi katika misingi ya haki, undugu, umoja na mshikamano kwa kutumia azimio la Tabora lilozinduliwa na chama hicho likiwa limewisha azimio la Arusha,”alisema.

 

Chama hicho kinatarajia kusimamisha madiwani, wabunge na nafasi ya urais katika Uchaguzi Mkuu wa Oktoba mwaka huu.

 

Akizungumzia tuhuma hizo msemaji wa chama hicho, Tumaini Makene alisema chama hicho hakina muda wa kuzungumzia tuhuma ambazo hazina mashiko.

Urais 2015: UKAWA Waahidi Neema Kwa Wachimbaji

SERIKALI itakayoundwa na Umoja wa Katiba ya Wananchi (UKAWA) imeahidi kuwapa kipaumbele wachimbaji wadogowadogo ikiwa ni pamoja na kuwajengea uwezo katika shughuli za uchimbaji wa madini huku ikihakikisha kuwa kampuni kubwa za uwekezaji zikilipa kodi stahiki ya Serikali.

 

Hayo yalisemwa juzi na Mwenyekiti wa Chama cha Wananchi (CUF) Profesa Ibrahimu Lipumba, alipokuwa akiwahutubia wakazi wa Kahama katika mkutano wa hadhara uliofanyika katika viwanja CDT mjini hapa.

 

Lipumba alisema kuwa kwa sasa Serikali imekuwa haiwajali wachimbaji wadogowadogo wa madini hususani wa madini ya dhahabu ambapo wamekuwa wakigundua maeneo yenye madini kisha baadaye huondolewa na Serikali kwa kile kinachodaiwa kuwa hawana leseni za kumiliki maeneo hayo.

 

Alisema kuwa wachimbaji hao wamekuwa waathirika kila wanapoibua maeneo ya mgodi kwani hutolewa badala ya Serikali kuwajengea uwezo wa uchimbaji pamoja na kuwaongezea mitaji hali ambayo ingesaidia kupunguza kukosekana kwa ajira tatizo ambalo ni kubwa kwa vijana nchini.

 

Aidha Lipumba aliitaka Serikali kutokuwakumbatia wawekezaji wakubwa hasa wa madini na kuwasahau wale wadogo ambao ndio chanzo cha kupatikana kwa maeneo ya uchimbaji na kuwa chanzo cha kukua kwa miji midogo katika maeneo ya uchimbaji wa madini.

 

Pamoja na mambo mengine Lipumba alisisitiza kwa Serikali kuwatafutia wakulima wa zao la tumbaku na pamba masoko ya uhakika yatakayoleta tija kwa wakulima na kuondokana na malalamiko yaliyopo kwa wakulima wa mazao hayo kwa sasa katika Kanda ya Ziwa.

 

Pia Lipumba alisema Ukawa itakapoingia madarakani haitatoa nafasi kwa kampuni kubwa kusamehewa kodi kwani kwa kufanya hivyo kunarudisha nyuma maendeleo ya taifa na kukosekana pato ambalo linaweza kuwasaidia wajasiriamali wadogo ambao hawana kipato kwa sasa.

Lowassa afunguka: "Nimechoka Kuitwa Fisadi .......Mwenye Ushahidi wa Rushwa dhidi Yangu Ajitokeze Ili Aeleze nilitoa lini, wapi na kwa nani."

Waziri Mkuu wa zamani, Edward Lowassa jana aliwataka wanaomhusisha na ufisadi kuacha mara moja kwa sababu hakuna hata chembe ya ukweli katika tuhuma hizo.

Lowassa, aliyeonekana kuzungumza kwa hisia, alisema hayo juzi mara baada ya kurejesha fomu ya kuwania kuteuliwa na CCM kugombea urais katika Uchaguzi Mkuu wa Oktoba 25.

Mbunge huyo wa Monduli alikuwa mmoja kati ya makada tisa waliorudisha fomu jana, ikiwa ni siku moja kabla ya kuisha kwa muda uliowekwa na chama hicho. 

 

Wengine waliorejesha fomu jana ni Elidephonce Bilohe, Mwigulu Nchemba, Luhaga Mpina, Dk Hamisi Kigwangalla, Hassy Kitine, Mariki Marupu, Dk Asha Rose Migiro na Lazaro Nyalandu.

Hadi sasa, tayari wanachama 32 kati ya 42 wa CCM walioomba kuteuliwa na chama hicho kugombea urais wamerudisha fomu na kazi hiyo itahitimishwa leo.

Hakuna mtu ambaye amejitokeza hadharani kumtuhumu Lowassa kwa ufisadi, lakini tuhuma hizo zimekuwa zikisambaa kwenye mitandao ya kijamii, hasa kutokana na mbunge huyo wa Monduli kujiuzulu nafasi ya Waziri Mkuu mwaka 2008 baada ya kuibuka sakata la mkataba wa ufuaji umeme wa dharura baina ya Serikali na Kampuni ya Richmond RDC ya Marekani ambayo ilionekana haina uwezo.

Wakati huo, Lowassa alisema kwenye hotuba yake ya kujiuzulu kuwa amefanya uamuzi huo “ili kuonyesha dhana ya uwajibikaji, lakini kutokubaliana na utaratibu uliotumika wa kusema uongo ndani ya Bunge kwa kumsingizia mtu.”

Akizungumza jana kwenye ofisi za makao makuu ya CCM, Lowassa alirudia wito wake wa kutaka wenye ushahidi wa tuhuma hizo wajitokeze hadharani.

“Nataka nitumie fursa hii kuwataka wale wote ambao wamekuwa wakinituhumu kwa miaka kadhaa sasa na kunihusisha na suala zima la rushwa, nawaambia waache mara moja, kwani hakuna chembe hata ya ukweli wa maneno hayo,” alisema.

“Natoa changamoto kwa yeyote mwenye ushahidi wa tuhuma hizo za kipuuzi, autoe na aeleze kwa ushahidi rushwa yoyote inayonihusu, aseme nimechukua lini, kwa nani, kwa lipi na kiasi gani?”

Alisema yeye ni mwadilifu na anaposema atasimamia vita dhidi ya rushwa atafanya hivyo kwa vitendo bila kumuonea mtu na bila kumuonea haya yeyote.

“Ndugu wanachama wenzangu na wananchi kwa jumla, ni lazima sasa tufike mahali tuseme imetosha. Majungu yametosha, upotoshwaji umetosha, rushwa imetosha na kwa pamoja tunaweza kukomesha haya. Tutayakomesha kwa kusimamia ukweli, uadilifu, uaminifu na kutenda kwa haki,” alisema.

Alisema tuhuma hizo zimeendelea hata wakati wa kutafuta wadhamini kwa baadhi ya watu kuzieneza.

“Tumefanya kazi ya kutafuta na kuomba udhamini kwa uadilifu na umakini mkubwa. Na hapa nitumie nafasi hii pia kuwashukuru makatibu na viongozi wote wa Chama katika mikoa na wilaya kwa maandalizi mazuri katika kuifanikisha zoezi hili,” alisisitiza.

Alisema kuwa walifanya kazi yao vizuri kinyume kabisa cha vijimaneno vilivyoenezwa kwamba kulikuwa na matumizi ya fedha katika kuwatafuta wadhamni.

“Hivi kweli, unahongaje watu zaidi ya laki nane?” alihoji.

Lowassa ambaye pia ni mbunge wa Monduli, alisema tuhuma hizo zimekuwa zikitolewa na watu ambao wamekosa hoja na zinatolewa bila ushahidi wowote.

Alisema akifanikiwa kushika wadhifa wa urais, ataendesha nchi kwa kufuata katiba na sheria.

Kuhusu safari ya kusaka wadhamini, Lowassa aliwashukuru wana-CCM waliomdhamini na kwamba walijitokeza kwa wingi jambo ambalo limempa picha ya kuungwa mkono na kukubalika.

Alisema wanachama waliojitokeza kumdhamini walifanya hivyo kwa utashi wao na bila kishawishi chochote cha fedha au fadhila nyingine yoyote.

Alisema kuwa udhamini alioupata ni kielelezo cha vitendo kwamba wapo naye katika Safari ya Matumaini.

“Nina matumaini na imani kubwa kwamba mtaendelea kuniunga mkono ndani ya Chamna chetu ili kwa pamoja na mshikamano ndani ya Chama niweze kuteuliwa kugombea kiti cha urais,” alisema.

Lowassa alisema: “Kwa mafanikio haya ya hatua ya awali nina imani kwamba ni ishara njema kueleke hatua zilizobakia na uweza wake Mwenyezi Mungu Mungu, na kwa ushirikiano wenu kwa pamoja tutalivuka daraja ili hatimaye niwatumikie kwa utumishi uliotukuka nikiwa Rais wa Awamu ya Tano.”

Aliongeza kuwa: “Nina shauku kubwa ya kuunganisha nguvu na uwezo ya kila Mtanzania katika kupambana na umasikini wa nchi hii. Umasikini wa watu wetu siyo amri ya Mwenyenzi Mungu. Nina imani kabisa kwa pamoja tunaweza kutumia rasilimali tulizo nazo kwa bidii, maarifa na ufanisi zaidi ili kutokomeza umasikini huu.”

Ukumbi wa Whitehouse, jana ulijaa wana-CCM ambao walifika kushuhudia Lowassa akirudisha fomu tofauti na idadi iliyowahi kutokea kwa wagombea wengine kadhaa waliomtangulia. 

 

Hali hiyo ilisababisha foleni kwenye Barabara ya Mtaa wa Kuu unaopita mbele ya ofisi za CCM, na kusababisha usumbufu kwa wapita njia.

Lowassa alifika akiwa ameongozana na mwanasiasa mkongwe nchini, Kingunge Ngombale Mwiru na wenyeviti wa chama hicho wa mikoa kadhaa pamoja na wabunge.

Wabunge hao ni Andrew Chenge (Bariadi Magharibi), Peter Serukamba (Kigoma Mjini), Diana Chilolo (Viti Maalumu), Profesa Juma Kapuya (Urambo Magharibi), Mary Chitanda (Viti Maalumu), Naibu Waziri wa Kazi na Ajira, Dk Makongoro Mahanga na Mary Mwanjelwa (Viti Maalumu).

Baadhi ya wenyeviti wa CCM wa mikoa waliomsindikiza ni Jesca Sambatavangu kutoka Iringa, Ramadhan Madabida (Dar es Salaam), Khamis Mgeja (Shinyanga), Mgana Msindai (Singida) na Joseph Msukuma (Geita).

CHADEMA Yaibwaga CCM Mahakamani........Matokeo ya Uchaguzi Wenyeviti 16 Yatenguliwa

Chama cha Mapinduzi (CCM), Wilaya ya Simanjiro mkoani Manyara imezidi kupata pigo baada ya Mahakama kutengua matokeo ya uchaguzi wa wenyeviti wa vitongoji 16 vya mji mdogo wa Mirerani, kwa maelezo kuwa ulikiuka sheria na utaratibu wa Uchaguzi wa Serikali za Mitaa. 

 

Hii ni mara ya pili katika kipindi cha mwezi mmoja kwa Mahakama kutengua matokeo ya uchaguzi huo ambao uliwaweka madarakani makada wa CCM.
 

Awali, Mei 30 Mahakama ya Hakimu Mkazi Wilaya ya Kiteto ilitengua matokeo ya uchaguzi wa mwenyekiti wa Kijiji cha Lobosireti kwa kukiuka sheria na utaratibu.
 

Chadema ilifungua kesi kadhaa mahakamani hapo kupinga kitendo cha wagombea wa CCM kupewa ushindi bila kufanya uchaguzi Desemba 14, mwaka jana.
 

Hukumu hiyo ya jana, inatokana na kesi zilizofunguliwa na Chadema wilayani Simanjiro kwenye kata za Endiamtu na Mirerani, wakipinga wagombea wa CCM kupewa ushindi bila kupigiwa kura kwenye Uchaguzi wa Serikali za Mitaa uliofanyika Desemba 14 mwaka jana.
 

Hakimu Mkazi Mfawidhi mahakama hiyo, Elimo Massawe aliagiza kurudiwa kwa uchaguzi wa viongozi wa vitongoji vya Zaire, Kisimani, Tenki la Maji, Endiamtu, Kairo na Kazamoyo vilivyoko Kata ya Ediamtu.
 

Hakimu Massawe alitaja vitongoji vingine kuwa ni Sekondari, Kilimahewa, Tanesco, Kazamoyo Juu, Mji mpya, Tupendane na vitongoji vya Kata ya Mirerani ambavyo ni Kangaroo, Songambele A, Getini na Songambele B.
 

Katika kesi hiyo, Chadema iliwakilishwa na mawakili James Millya, Shadrack Kimomogoro na Daudi Haraka na Mahakama iliamuru walipwe Sh160 milioni za gharama za kesi hiyo ambayo ilichukua takribani miezi sita hadi kutolewa hukumu.
 

Katibu Mwenezi wa Chadema mkoani Manyara, Ambrose Ndege alisema Mahakama imetenda haki kwa kutoa hukumu sahihi na wanajipanga ipasavyo kuhakikisha watashinda vitongoji vyote pindi uchaguzi huo utakaporudiwa.
 

“Tuliwaeleza tangu awali kuwa uchaguzi ukifanyika tutawashinda saa nne asubuhi hivyo tunawasubiri uwanjani na tutaongoza Mamlaka ya Mji wa Mirerani kwani wananchi wanatukubali,” alisema Ndege.
 

Hata hivyo, Katibu Mwenezi wa CCM wa Kata ya Endiamtu, Mashaka Jeroro alisema wanatarajia kukata rufaa kupinga hukumu hiyo akisema wagombea wa Chadema walikosea kujaza fomu ndiyo sababu wakawekewa pingamizi.

Membe Arudisha Fomu Ya Urais......Akana Kuhusika Na Ufisadi Wa Mabilioni Ya Libya.

WAZIRI wa Mambo ya Nje na Ushirikiano wa Kimataifa, Bw. Bernard Membe, jana amerudisha fomu ya kuomba kuteuliwa na CCM ili aweze kuwa mgombea urais katika Uchaguzi Mkuu, Oktoba 25, mwaka huu, kwa tiketi ya chama hicho.

Mbali ya kurudisha fomu hiyo katika Ofisi Kuu ya CCM, Mjini Dodoma, Bw. Membe alitumia fursa hiyo kuzungumzia taarifa za uvumi dhidi yake kuwa anahusika na ufisadi wa mabilioni ya Libya na kusisitiza uvumi huo ambao unaenezwa na wanasiasa wenzake hauna mashiko.

Alisema wanasiasa wanaoeneza uvumi huo, wanafahamu ukweli wa jambo hilo lakini kwa makusudi wanataka kuifanya jamii ya Watanzania iuamini na kuukubali ambapo yupo tayari kujiuzulu nafasi yake ikibainika amehusika kuchukua hata dola moja.

Aliongeza kuwa, hahusiki na ufisadi wowote wa dola za Marekani milioni 20 kama taarifa za uvumi huo zinavyodai na kulitolea ufafanuzi suala  hilo pamoja na mchakato wake ulivyokwenda.

Bw. Membe alisema, Libya ni kati ya nchi wafadhili wa Tanzania kama ilivyo kwa wafadhili wengine ambayo imekuwa ikitoa misaada na mikopo yenye masharti nafuu kwa Serikali ya Tanzania.

Alisema Serikali imekuwa ikifanya taratibu za kulipa madeni ya nchi wafadhili kwa njia tofauti ikiwemo ya kubadili madeni na  kuyaingiza katika miradi yaani 'Dept Swap'.

Alisisitiza kuwa, katika utaratibu huo, Julai 20,2005, Serikali ya Tanzania na Libya zilitiliana saini mkataba wa kubadili deni (Dept Swap Agreement) ambapo uliweka utaratibu wa matumizi na urejeshaji fedha za deni la Libya.

Aliongeza kuwa, Machi 4,2009, Serikali ya Libya na Tanzania zilitiliana saini mkataba wa nyongeza ambao pamoja na mambo mengine, ulizungumzia matumizi ya dola za Marekani milioni 20 zilizokuwa zimehifadhiwa katika akaunti ya Libya No. 004-200-0002216-01, Benki ya Rasilimali (TIB).

Bw. Membe alisema nyongeza hiyo ya mkataba, ilitamka wazi kwenye kifungu No. 4.02, kwamba, fedha zilizopo katika akaunti tajwa, zikopeshwe mwekezaji waliyemteua wenyewe Kampuni ya Meis Industries Limited ili iweze kutekeleza mradi wa ujenzi wa Kiwanda cha Saruji, mkoani Lindi.

Mkopo huo ulipaswa kulipwa ndani ya miaka sita na baada ya hapo, fedha hizo zirejeshwe na ziendelee kukopeshwa Watanzania kwa ajili ya miradi mingine ambayo Serikali za Libya na Tanzania zitakuwa zimeridhia.

Alisema kabla Serikali ya Libya haijatia saini nyongeza ya mkataba huo uliotaka fedha zikopeshwe kwa kampuni hiyo,  upembuzi yakinifu wa mradi husika ulifanywa na Serikali ya Libya kupitia vyombo vyake na wao kujiridhisha juu ya ubora wa mradi huo.

Alifafanua kuwa, Serikali ya Libya kupitia Ubalozi wake nchini, iliendelea kusisitiza kwa maandishi kwamba Serikali ya Tanzania iharakishe mchakato wa kuwezesha fedha hizo zikopeshwe kwa mwekezaji waliyemteua ili mradi huo usiendelee kuchelewa na pia fedha ambazo zitarejeshwa ziendelee kuwanufaisha Watanzania.

"Katika kutekeleza mikataba hii yaani Dept Swap Agreement pamoja na Addendum Dept Swap Agreement pia kwa kuzingatia umuhimu ambao Serikali ya Libya iliuonesha, Serikali ya Tanzania kupitia wataalamu wake wa Wizara ya Fedha, TIB, Ofisi ya Mwanasheria Mkuu na Mwekezaji (kampuni ya Meis), walikutana chini ya usimamizi wa Wizara ya Fedha na kuandaa hadidu  rejea.

"Hadidu hizo zilisababisha kutengenezewa mkataba wa uwekezaji kati ya Serikali ya Tanzania, TIB, Serikali ya Libya na mwekezaji ambapo Serikali ya Tanzania, TIB na Mwekezaji, walitia sahihi mkataba huo na kuupeleka Libya ili Serikali yao iweze kutia saini," alisema.

Bw. Membe alisema, kwa sababu ambazo hazikufahamika, Serikali ya Libya haikutia saini mkataba huo ambapo baada ya mwekezaji kufuatilia muda mrefu bila mafanikio, alimwandikia barua Mwanasheria Mkuu wa Serikali ya Tanzania yenye No. PC/MEIS/AG/2/10, Septemba mosi, 2010 akieleza kusudio la kuipeleka Serikali ya Libya Mahakamani kwa kitendo chake cha kutokutia saini mkataba huo.

Alisema Septemba 13,2010, mwekezaji alifungua shauri la madai katika Mahakama Kuu ya Tanzania No. 124/2010 dhidi ya Serikali ya Libya, akiomba Mahakama Kuu itoe tamko kwamba, kitendo cha Serikali ya Libya kukataa kutia saini mkataba huo hakikuwa cha haki.

Kampuni hiyo pia iliitaka Mahakama hiyo itoe amri kuwa fedha hizo zitolewe kwa mwekezaji ili aweze kutekeleza mradi uliokusudiwa ambapo kumbukumbu zinaonesha wito wa Mahakama (Summons), ulipelekwa Ubalozi wa Libya lakini hakukuwa na majibu wala mwakilishi aliyekwenda mahakamani.

"Mahakama Kuu kwa kufuata taratibu zake, iliendelea kusikiliza shauri na kutoa amri ya fedha hizo kutolewa kwa mwekezaji aweze kutekeleza mradi husika...Benki ya TIB na Ofisi ya Mwanasheria Mkuu wa Serikali walifanya juhudi za kupinga amri hiyo au kupata ufafanuzi zaidi juu ya utekelezwaji wake.

"Hata hivyo, Mahakama Kuu pamoja na Mahakama ya Rufaa kwa nyakati tofauti, zilishughulikia maombi hayo...TIB ilifungua maombi No. 126/2010 Mahakama ya Rufaa kuiomba izuie na kufuta utekelezaji wa amri ya Mahakama Kuu na maombi hayo yalifanyiwa uamuzi wa mwisho Novemba 7,2011 kwa kuondolewa mahakamani," alisema.

Bw. Membe aliongeza kuwa, kwa mujibu wa Mahakama ya Rufaa, ilisema maombi hayo hayakuwa yamefuata taratibu za kisheria ambapo Mwanasheria Mkuu wa Serikali, naye alipeleka maombi Mahakama ya Rufaa No. 146/2010 akiomba Mahakama hiyo kufuta mwenendo wa kesi na amri ya Mahakama Kuu.

Alisema Mwanasheria Mkuu pia alipeleka maombi ya pili No. 147/2010 ikiiomba Mahakama ya Rufaa izuie utekelezaji wa amri ya Mahakama Kuu ambapo maombi yote yalisikilizwa na kuamuliwa kwa mujibu wa sheria na taratibu za kimahakama.

Aliongeza kuwa, wakati mvutano huo ukiendelea, ilijitokeza Kampuni ya Mohamed Enterprises Limited ikidai ina haki juu ya fedha hizo hivyo na wao walipeleka maombi Mahakama Kuu kuzuia utekelezaji wa hukumu wakidai kampuni hiyo ilikuwa ikiishtaki Serikali ya Libya.

Kampuni hiyo ilidai walifungua kesi ya madai No. 110/2010 hivyo amri ya Mahakama Kuu ikitekelezwa na kumpa fedha hizo mwekezaji, wangekosa mahali pa kukazia hukumu waliyoitarajia katika kesi yao kwa Serikali ya Libya ambapo maombi yao yalisikilizwa na kutolewa maamuzi stahiki.

"Kampuni ya Mohamed Enterprises Limited haikuridhika na uamuzi wa Mahakama Kuu hivyo walipeleka shauri Mahakama ya Rufaa kupitia maombi No. 2/2011 ambayo nayo yalisikilizwa na kutolewa maamuzi.

"Mwisho wa yote, maamuzi ya Mahakama Kuu na Mahakama ya Rufaa katika mchakato huu, mwekezaji alikuwa na haki ya kupewa fedha za mradi wa Kiwanda cha Saruji mkoani Lindi kama ilivyoainishwa katika mkataba kati ya Serikali ya Tanzania na Libya," alisema Bw. Membe.

Alisema ni wazi kuwa, mgogoro huu ulichujwa na mahakama hadi ngazi ya juu kwa nyakati tofauti, mbele ya Majaji wa Mahakama Kuu na Rufaa ambapo katika Taifa linaloongozwa kikatiba, chini ya utawala wa sheria kama Tanzania, Mahakama ndicho chombo kilichopewa mamlaka ya mwisho kuamua juu ya haki za raia na Serikali.

Aliongeza kuwa, si rahisi na hatakuwa sahihi kwa mtu yeyote kuhoji uhalali wa mchakato huo ulivyoongozwa, kuelekezwa, kuamuliwa na mahakama, bali sheria inatoa mwanya wa kurudi mahakamani kwa mtu ambaye hajaridhika au anayetaka kuhoji maamuzi haya.

Bw. Membe alisema kwa mtu yeyote mwenye kutazama masilahi ya nchi ni dhahiri kuwa suala  la utekelezaji mikataba ya kubadilishana madeni ni jambo lenye manufaa kwa Tanzania na fursa inapotokea itekelezwe.

"Nchi wafadhili, wanapotoa fursa za kutupunguzia mzigo wa madeni katika utaratibu wenye manufaa kama huu, tutaonekana wa ajabu tukiendelea kulumbana badala ya kuchangamkia fursa ya maendeleo.

"Mimi kama Mbunge kutoka mkoani Lindi na Waziri mwenye dhamana ya Mambo ya Nje na Ushirikiano wa Kimataifa, nalifuatilia kwa karibu suala hili kwa sababu kuu mbili; moja mradi huu utawanufaisha wapiga kura wangu na Watanzania kwa kuinua uchumi wao, kuongeza ajira kwenye mikoa ya Kusini ambayo imeachwa nyuma," alisema.

Alisema utafiti unaonesha kuwa Mikoa ya Lindi na Mtwara ina utajiri mkubwa wa malighafi ya saruji na upo uhakika wa kupata saruji bora na kwa bei nafuu sana...sababu ya pili suala hili linagusa uhusiano wa nchi mbili; hivyo lazima wizara yangu ilisimamie kwa nguvu, umahiri na kwa  umakini wote.

"Fedha hizi ambazo ni mkopo zilizotolewa kwa amri ya Mahakama na hazikuchukuliwa kama zile za EPA au Escrow, bali ni mkopo ambao ulitolewa kwa Kampuni ya Meis kulingana na mkataba wa makubaliano yenye masharti ya kibenki na ikishindwa kuulipa, itafilisiwa mali zake na TIB itarudishiwa fedha zake," alisema.

Bw. Membe alisema yeye hana kampuni nchini, hana ubia na kampuni yoyote ikiwemo ya Meis na hana hisa katika kampuni hiyo, hajafaidika na mkopo huo ambao unasimamiwa na TIB.

Aliongeza kuwa, ujenzi wa kiwanda hicho unaendelea vizuri na mitambo yote inayotakiwa katika ujenzi tayari imewasili ambapo asilimia 45 ya ujenzi wa kiwanda hicho, umekamilika na matarajio ya kampuni husika ni kiwe kimekamilika ifikapo Desemba, mwaka huu.

Alisema kama kuna mtu anahitaji taarifa zaidi awe huru kuihoji kampuni ya Meis, TIB ambayo imetoa mkopo huo, kwenda kwa Msajili wa Mahakama Kuu na Mahakama ya Rufaa ambazo zote ziliamua kampuni hiyo ipewe mkopo kwa mujibu wa sheria za kibenki.

Bw. Membe aliwataka wagombea wenzake wa nafasi ya urais ndani ya CCM, kukubali matokeo; lakini suala la mgombea kujiaminisha kuwa jina lake haliwezi kukatwa si la kiungwana.

"Jina langu likikatwa nitawaunga mkono mgombea ambaye atapita, lengo letu ni ushindi, mwanasiasa aliyekomaa hawezi kusema jina lake haliwezi kukatwa," alisema Bw. Membe.